Inspicere autem debebimus primum nosmet ipsos, deinde ea quae
adgrediemur negotia, deinde eos quorum causa aut cum quibus. Ante omnia necesse
est se ipsum aestimare, quia fere plus nobis videmur posse quam possumus. Considerandum
est utrum natura tua agendis rebus an otioso studio contemplationique aptior
sit, et eo inclinandum quo te vis ingenii feret: Isocrates Ephorum1
iniecta manu a foro subduxit, utiliorem componendis monumentis historiarum
ratus. Male enim respondent coacta ingenia; reluctante natura inritus labor
est. Aestimanda sunt deinde ipsa quae adgredimur, et vires nostrae cum rebus
quas temptaturi sumus comparandae. Debet enim semper plus esse virium in actore
quam in opere: necesse est opprimant onera quae ferente maiora sunt. Quaedam
praeterea non tam magna sunt negotia quam fecunda multumque negotiorum ferunt:
et haec refugienda sunt ex quibus nova occupatio multiplexque nascetur, nec
accedendum eo unde liber regressus non sit; ||| iis admovenda manus est quorum
finem aut facere aut certe sperare possis, relinquenda quae latius actu
procedunt nec ubi proposueris desinunt.
1 Eforo di Cuma:
allievo di Isocrate che divenne famoso come scrittore di storia
Nessun commento:
Posta un commento