Agamus
igitur pingui,
ut aiunt,
Minerva.
Qui ita se gerunt,
ita vivunt,
ut eorum probetur fides,
integritas, aequalitas, liberalitas
nec sit in eis ulla
cupiditas, libido, audacia
sitque magna
constantia,
ut ei fuerunt,
modo quos nominavi,
hos viros bonos,
ut habiti sunt,
sic etiam appellandos
putemus,
quia sequantur,
quantum homines
possunt,
naturam optimam ducem
bene vivendi.
Sic
enim mihi videor
perspicere,
ita natos esse nos,
ut inter omnes esset
societas quaedam,
maior autem,
ut quisque proxime
accederet.
Itaque
cives potiores quam peregrini,
propinqui
quam alieni.
Cum
his enim amicitiam natura ipsa peperit,
sed
ea non satis habet firmitatis.
Namque
hoc praestat amicitia propinquitati,
quod ex propinquitate
benevolentia tolli potest,
ex amicitia non potest:
sublata enim
benevolentia
amicitiae
nomen tollitur,
propinquitatis
manet.
Nessun commento:
Posta un commento