Patre
Marte natus (concedamus enim famae hominum, praesertim non inveteratae solum,
sed etiam sapienter a maioribus proditae, ut bene meriti de rebus communibus
genere putarentur non solum ingenio esse divino), is igitur, ut natus sit, cum
Remo fratre dicitur ab Amulio, rege Albano, ob labefactandi regni timorem ad
Tiberim exponi iussus esse; quo in loco cum esset silvestris beluae sustentatus
uberibus pastoresque eum sustulissent et in agresti cultu laboreque aluissent,
perhibetur, ut adoleverit, et corporis viribus et animi ferocitate tantum
ceteris praestitisse, ut omnes qui tum eos agros ubi hodie est haec urbs
incolebant, aequo animo illi libenterque parerent. Quorum copiis cum se ducem
praebuisset, ut iam a fabulis ad facta veniamus, oppressisse Longam Albam,
validam urbem et potentem temporibus illis, Amuliumque regem interemisse
fertur.
Nessun commento:
Posta un commento