Firmamentum
autem stabilitatis constantiaeque eius,
quam in amicitia
quaerimus,
fides
est;
nihil
est enim stabile
quod infidum est.
Simplicem praeterea et
communem et consentientem,
id est
qui rebus isdem
moveatur,
eligi
par
est,
quae omnia pertinent ad
fidelitatem;
neque
enim fidum potest esse multiplex ingenium et tortuosum,
neque
vero,
qui non isdem rebus
movetur
naturaque consentit,
aut
fidus aut stabilis potest esse.
Addendum
eodem est,
ut ne criminibus aut
inferendis delectetur
aut credat oblatis,
quae pertinent omnia ad
eam,
quam iam dudum tracto,
constantiam.
Ita
fit verum illud,
quod initio dixi,
amicitiam non posse
nisi inter bonos esse.
Est
enim boni viri,
quem eundem sapientem
licet dicere,
haec duo tenere in
amicitia:
primum
ne quid fictum sit
neve simulatum;
aperte enim vel odisse
magis
ingenui est
quam fronte occultare
sententiam;
deinde
non solum
ab aliquo allatas
criminationes
repellere,
sed ne ipsum quidem
esse suspiciosum,
semper existimantem
aliquid ab amico esse
violatum.
Oportet
accedat huc suavitas
quaedam sermonum atque morum, haudquaquam mediocre condimentum amicitiae.
Tristitia
autem et in omni re severitas habet illa quidem gravitatem,
sed
amicitia debet
remissior esse et
liberior et dulcior et ad omnem comitatem facilitatemque proclivior.
Nessun commento:
Posta un commento