Platone: Apologia [III parte] (struttura)

Apologia di Socrate [19a-19d] (struttura)

Ἀναλάβωμεν οὖν ἐξ ἀρχῆς

τίς ἡ κατηγορία ἐστὶν

ἐξ ἧς ἡ ἐμὴ διαβολὴ γέγονεν,

ᾗ δὴ καὶ πιστεύων Μέλητός με ἐγράψατο τὴν γραφὴν ταύτην.

Εἶεν·

τί δὴ λέγοντες

διέβαλλον οἱ διαβάλλοντες;

δεῖ

τὴν ἀντωμοσίαν ἀναγνῶναι αὐτῶν·

ὥσπερ οὖν κατηγόρων

«Σωκράτης ἀδικεῖ

καὶ περιεργάζεται

ζητῶν τά τε ὑπὸ γῆς καὶ οὐράνια

καὶ τὸν ἥττω λόγον κρείττω ποιῶν

καὶ ἄλλους ταὐτὰ ταῦτα διδάσκων.»

Τοιαύτη τίς ἐστιν·

ταῦτα γὰρ ἑωρᾶτε καὶ αὐτοὶ ἐν τῇ Ἀριστοφάνους κωμῳδίᾳ,

Σωκράτη τινὰ ἐκεῖ περιφερόμενον,

φάσκοντά τε

ἀεροβατεῖν

καὶ ἄλλην πολλὴν φλυαρίαν φλυαροῦντα,

ὧν ἐγὼ οὐδὲν οὔτε μέγα οὔτε μικρὸν πέρι ἐπαΐω.

Καὶ

οὐχ ὡς ἀτιμάζων τὴν τοιαύτην ἐπιστήμην

λέγω,

εἴ τις περὶ τῶν τοιούτων σοφὸς ἐστιν

– μή πως ἐγὼ ὑπὸ Μελήτου τοσαύτας δίκας φεύγοιμι –

ἀλλὰ γὰρ ἐμοὶ τούτων, ὦ ἄνδρες Ἀθηναῖοι, οὐδὲν μέτεστιν.

Μάρτυρας δὲ αὖ ὑμῶν τοὺς πολλοὺς παρέχομαι,

καὶ ἀξιῶ

ὺμᾶς ἀλλήλους διδάσκειν τε καὶ φράζειν,

ὅσοι ἐμοῦ πώποτε ἀκηκόατε

διαλεγομένου

– πολλοὶ δὲ ὺμῶν οἱ τοιοῦτοί εἰσιν –

φράζετε οὖν ἀλλήλοις

εἰ πώποτε ἢ μικρὸν ἢ μέγα ἤκουσέ τις ὑμῶν ἐμοῦ

περὶ τῶν τοιούτων διαλεγομένου,

καὶ ἐκ τούτου γνώσεσθε

ὅτι τοιαῦτ’ἐστὶ καὶ τἆλλα περὶ ἐμοῦ

ἃ οἱ πολλοὶ λέγουσιν.

Ἀλλὰ γὰρ οὔτε τούτων οὐδέν ἐστιν.