Non videtur esse praetermittendum de
virtute militis veterani V legionis. Nam cum in sinistro cornu elephans vulnere
ictus et dolore concitatus in lixam inermem impetum fecisset eumque sub pede
subditum dein genu innixus pondere suo proboscide erecta vibrantique stridore
maximo premeret atque enecaret, miles hic non potuit pati quin se armatus
bestiae offerret. Quem postquam elephans ad se telo infesto venire
animadvertit, relicto cadavere militem proboscide circumdat atque in sublime
extollit armatum: qui in eiusmodi periculo cum constanter agendum sibi videret,
gladio proboscidem qua erat circumdatus, caedere quantum viribus poterat non
destitit. Quo dolore adductus elephans milite abiecto maximo cum stridore
cursuque conversus ad reliquas bestias se recepit.
Nessun commento:
Posta un commento