Quintiliano: La lettura dei poeti è utile all’oratore (struttura)

Dicit Theophrastus

plurimum oratori conferre lectionem poetarum

multique eius iudicium sequuntur;

neque immerito.

Namque ab his in rebus spiritus et in verbis sublimitas et in adfectibus motus omnis et in personis decor petitur,

praecipueque

velut attrita cotidiano actu forensi

ingenia optime rerum talium blanditia reparantur;

ideoque Cicero putat

in hac lectione requiescendum.

Meminerimus tamen,

non per omnia poetas esse oratori sequendos

nec libertate verborum nec licentia figurarum:

poeticam genus ostentationi comparatum,

et praeter id,

quod solam petit voluptatem

eamque

etiam fingendo non falsa modo sed etiam quaedam incredibilia

sectatur,

patrocinio quoque aliquo iuvari:

quod

alligata ad certam pedum necessitatem

non semper uti propriis possit,

sed

depulsa recta via

necessario ad eloquendi quaedam deverticula confugiat,

nec cogatur

mutare quaedam modo verba,

sed extendere,

corripere,

convertere,

dividere;

nos vero armatos stare in acie

et summis de rebus decernere

et ad victoriam niti.