Existimo
illud ex consuetudine
mutandum prorsus in iis aetatibus,
de quibus nunc
disserimus,
ne omnia
quae scripserint
ediscant
et certa,
ut moris est,
die dicant;
quod quidem maxime
patres exigunt
atque ita demum
studere liberos suos,
si quam frequentissime
declamaverint,
credunt,
cum profectus praecipue diligentia constet.
Nam
ut plane velim
scribere pueros
plurimumque esse in hoc
opere,
sic
ediscere electos locos
ex orationibus vel
historiis aliove quo genere dignorum ea cura voluminum,
multo
magis suadeam.
Nam
et exercebitur acrius memoria
aliena complectendo
quam sua;
et
qui erunt in
difficiliore huius laboris genere versati,
sine
molestia
quae ipsi composuerint
iam familiaria
animo
suo adfigent,
et adsuescent optimis
semperque habebunt
intra se,
quod imitentur;
et
iam non sentientes formam orationis illam,
quam mente penitus acceperint,
expriment.
Nessun commento:
Posta un commento